Silent Hill 3

(2003)

Nuk mund t’ia mbathësh nga e shkuara, herët a vonë ajo do të arrijë

Ka dy lloj fansash të serisë SH: ata që e pëlqyen këtë titull të tretë dhe ata që e pëlqyen shumë. Pavarësisht se kujt kategorie të fansave i përkisni, Silent Hill 3 eksploron shumë tema, ndër to edhe atë që mund të konsiderohet si persekutimi nga e shkuara e individit, jo për ato që ka bërë por për atë që është. 

Heather e zbulon këtë në mënyrën më të frikshme të mundshme. Heather në këtë titull të tretë është në të vërtetë Sheryl nga titulli i parë.

Mekanizmat e lojës nuk ndryshojnë shumë nga ato paraardhëse; armët po që ndryshojnë. Grafikët duket sikur janë përmirësuar disi duke ruajtur njëkohësisht atmosferën tmerruese për të cilat seria njihet mirë.

Sheryl vetë nuk shikon ndonjë arsye se pse duhet të ndiqet nga kulti i çmendur i qytezës Silent Hill pasi nuk është se ka bërë ndonjë krim apo mëkat. Qëllimi i saj i vetëm është të gjejë Herryn (babanë adoptues). Gati e gjithë loja përpiqet të shpjegojë se nuk mund të shpëtosh lehtë nga Silent Hill (filmi i parë pak a shumë e sqaron këtë pasi personazhi kryesore Roz, e luajtur me mjeshtri nga aktorja Radha Mitchell, nuk largohet dot nga Silent Hill në fund të filmit).

E vetmja mënyrë për t’i mbyllur hesapet një herë e mirë me qytezën fantazmë, është të përballet me të duke përdorur çdo armë në dispozicion. Filmi i dytë Silent Hill Revelation 3D i qëndronte deri diku besnik origjinalit.

Loja është një third person shooting ku Heather i duhet të luftojë, të gjejë rrugën, të zgjidhë gjëegjëza dhe sigurisht me veprimet e saj, mundësisht të marrë fundin më të mirë të mundshëm.

Filmi me të njëjtin titull bënte një punë të mirë në rezervimin e historisë së paprekur. Silent Hill Revelation pak a shumë tregon sesi Heather kalon nga bota reale në atë të makthit. Filmi nuk pati shumë shitje, megjithatë ishte diçka e bukur, që u prit mirë nga fansat e serisë, përveç atyre që mendonin se Kokë-piramida nuk duhej të ndodhej në film pasi nuk kishte lidhje (edhe pse kishte lidhje me filmin e parë).